نزلت اعمل خير رجعت بمصيبة

هكيلكم من الأول..من حوالي اسبوعين خطيبي كلمني انه حصلتله مشكلة كبيرة جدااا في شغله وهو مسافر وان كفيله طلع مش كويس وضحك عليه وبكده هو اتفصل من شغله لا وكمان كفيله طالب منه فلوس كتيرة جداا علشان يخليه يشتغل بره ...طبعا ديه كانت زي الكارثة بالنسبة لينا ولمواعيد فرحنا ومابقتش عارفة اعمل ايه وحسيت اني هموت من الحزن والكرب ..بس هديت عليه وقلتله ربنا يفرجها علينا ...وبعدها بيومين لقيت نفسي عملت غلطة مش معقولة في شغل على النت الغلطة ديه كانت هتكلفني تعب أسبوعين ومبلغ وقدره ..وقتها حسيت ان الدنيا اسودت ومابقتش قادرة اتنفس.....

وانا بعيط لقيت موبايلي بيرن ولقيت واحدة غلبانة كنت ساعدتها مرة واحدة في حياتي ومش فاكرة حتى اني سجلت نمرتها ...لقيتها بتقولي انها عايزة بطانية وانها في كرب كبير وهي بتتكلم بقيت متضايقة اوي وفي سري بقول استغفر الله العظيم هي ناقصة ..ده انا محتاجة اللي يساعدني ..بس وهي بتتكلم فكرت ان هل انا وفي عز ازمتي ممكن ربنا يجعلني سبب في فك كرب واحدة ؟؟وفعلا نزلت بعتلها الفلوس وانا مش عارفة هقبض تاني اصلا ولا ؟؟...وفضلت مستنية ان ربنا يجازيني على اللي عملته ...(ديه طبعا قلة ايمان بس وقتها للأسف كنت بفكر كده )
بس ما حصلش اي حاجة كويسة بل زاد عليها ان خطيبي تعب جدااا ودخل المستشفى من كتر الكرب الي كان فيه هناك ...
حسيت نفسي اني مش قادرة وقعدت اعيط لربنا كتير اوي يرفع عني الكرب ده ...وان بس خطيبي يرجع ان شاء الله حتى نبدأ من الصفر بس يخف ويتعتق من ايد كفيله ده ..وحسيت انا قد ايه ضعيفة وقد ايه ربنا بيبدل حال من حال في لحطة ... المهم نزلت وقلت ياربي انا مش قادرة اساعد نفسي بس ساعدني افرج كرب المسلمين ..

وخدت فلوس وقلت هتبرع بجزء والباقي هشحن بيه لاني انا اللي هكلم خطيبي لانه معهوش فلوس وفي المستشفى المهم نزلت اتبرعت بمبلغ لجميعة واتصلت بأسرة سورية ماما كانت بتساعدهم واتفقت هقابل الست في الشارع اديها الفلوس وسبحان الله لما كلمتها لقيتها بتعيط وبتقولي انا كنت لسه بدعي ربنا يفك كربي ..انا جوزي محجوز في المستشفى ودفعت كل اللي معايا ومش معايا فلوس حتى اروح البيت ...فقلتلها خليكي وانا جايالك وروحت وسلمت عليها وبحط ايدي في جيبي اطلع الفلوس مالقتهاش  الفلوس كلها وقعت ..

بقيت حاسة اني هموت من الحزن وبقى هاين عليا اصرخ واقول ليه يارب ده انا نازلة اساعد ..استغفر الله العظيم الف مرة بس انا حسيت بده وقتها ...وشفت في عين الست نفس الحسرة ولقيتها وقعت مني في الأارض .... 

بس سبحان الله ربنا الهمني اني مش هكسر بخاطرها وان ربنا اكيد بيختبرني ..

استاذنتها وروحت البوسطة وانا مش قدارة ابطل عياط ومش عارفة بعيط على نفسي ولا عليها و سحبت اخر فلوس كانت عندي ...ورجعت ادتهوملها ولقيتها خدتهم وفضلت تعيط وما نطقتش وانا كمان مكنتش قادرة اتكلم ...

والله العظيم رجعت البيت كلهم اتخضوا عليا من منظري وقلتلهم وقع مني فلوس..طبعا قالولي ما تزعليش وهنديكي وكده ..

ودخلت اوضتي وقعدت فوق ال3 ساعات بعيط وبستغفر بس ..ومش قادرة افكر ولا عايزة افكر في حاجة غير اني بقول يارب فك كربي يارب انت الكريم واحنا الفقرا لكرمك 

والله العظيم والله العظيم لسه ما قمت من مكاني لقيت في ايميل جاني بفتح الإيميل ألاقي شغل بمبلغ شهري اكتر 3 مرات من اللي بحلم بيه ..تقريبا ضعف المبلغ اللي اديته للست السورية وايه كل شهر .. ما صدقتش عينا وطلعت قلتلهم كلهم الفلوس اللي ضاعت مني رجعتلي تاني واضعاف كل شهر . ألف حمد وشكر ليك يارب الف حمد وشكر


وبعدها بنص ساعة وانا بتحايل على اخواتي يشحنولي علشان افرح خطيبي لقيته هو بيتصل بيا بيحكيلي حاجة ولا في الأحلام ...وهو في المستشفى جيه واحد يزوره ما نعرفش عرفه منين ..بس بيقوله انا بدور على واحد بمؤهلاتك يشتغل عندي بس يبدأ من اول الأسبوع الجاي ..وبمرتب اكتر من مرتب خطيبي الأولاني أصلا ..وانه هيدفع تقريبا تلتين الفلوس اللي طالبها كفيله ...طبعا خطيبي قاله انا عايز امشي من عند كفيلي الحالي فلو ممكن انا اجي ؟؟الراجل فرح جدااا وقاله ماشي وبكره نمضي العقد 

والله العظيم انا دلؤتي بكتب ومش قادرة اصدق اللي حصل ..بس سبحان الله كرم ربنا كبير اووووي ..وفعلا الراحمون يرحمهم الله ...عارفين يابنات كل ما افكر في اللي حصل اقول سبحان الله ..ممكن تكون كل الاحداث ديه حصلت علشان واحدة غلبانة دعت ربنا بصدق يكرمها ..وربنا سخرنا كلنا علشان يوصلها رزقها ..وكام حد في الحكاية ديه ربنا استجابله ورزقه من حيث لا يحتسب ...

منقوق للفائدة