مكرونة باللحمة الضاني بالصور (سريييييييييعة)
اللهم صلى وسلم على نبينا وحبينا وشفيعنا سيدنا محمد وعلى اله وصحبه وسلم
ازيكم يااحلى صحبة واجمل بنوتات
هنعمل مكرونة جميلة ولذيذة وسهلة كل اللى عنده ارض فى الطريق الصحراوى يعرفها اكيد
انا جوزى وولادى كانو بيكلوها هناك عند الشحات مكرونة ومرتاح وصافى مشهورين جدا هناك
انا اتعلمتها وبعملها على طول لانها سهلة ولذيذة
نشوف صورة وبعدين نتكلم
انتى هتحتاجى حاجات بسيطة جد للاكلة دى
لحمة ضانى مسلوقة
مكرونة ويفضل اسباجيتى
صلصة
فلفل اسود وعيدان قرفة وحبهان وطبعا بهارات لحمة
اولا تسلقى اللحمة الضانى مع حبهان وورق لورا وبصلة لحد تمام السوا وتكونى ظبطى ملحها وبهارتها
ثانيا نسلق المكرونة نص سلق عشان ننزل منها النشا بتاعها
انا شخصيا بحب اخليها على طولها لاكن يفضل انها تتقسم اتنين لانها هتكون فى صوص كتير ودة اللذيذ فى الموضوع
ونصفى المكرونة ونغسلها ونجهز شوربتنا باللحمة
نضيف لها الصلصة والفلفل الاسود وعيدان القرفة وبهارات اللحمة وبعدين نزل فيها المكرونة ونقلب ونتركها 10 دقايق تكمل
سواها وتتشرب من الصوص
شايفين بتبقى فى صوص كتير ازاى وخدى بالك لازم تكونى شايلة شوية شوربة على جنب لانها هيفضل منها ولما تحبى
تسخنى تزودى شوية شوربة ومعلقة صلصة بتزيد جمال كل ماتتسخن ويكون فيها صوص كتير
وتتغرف فى صنية بايركس او اركوبال لانها بتكون سخنة جدا وبعدين توزعى منها على الاطباق
انا مش عارفة لونها فاتح ليه مع ان لونها كان احمر ويجنن يظهر البوخار عامل شغل فى الموبايل
شفتو بقى طريقتها سهلة ازاى اتمنى تجربوها بجد هتعجبكم جدا هى شبه الاندومى بس على كبير وكتير
