من قصه شعر منى ذكى لطول شعر شريهان مش مصدقه تعالى شوفى بالصور والتفاصيل كمان!!
ازيكم احبائى وحشتونى مع انى مببعدش عنكم خالص ههههههههههههههههه
المهم ندخل فى المهم ده اول موضوع ليا هنا وباذن الله ينال اعجابكم وتستفادوا منه
وطبعا ده اهم حاجه عندى الاستفاده عشان اخد دعوه حلوه كده من دعواتكم
يلا نبدأ ونقول
انا يا جماعه زى كتير منكم كنت بعانى من سقوط شعرى وتقصفه الشديد والميزه الوحيده
اللى فيه انه ناعم بس يا فرحتى وهو ناعم وخفيف وبايظ فطبعا كنت بضطر اقصه
اكرم لى لغايه اخر مره قصيته القصه بتاعة منى ذكى فى فيلم احكى يا شهرزاد وده شكل القصه
للى مش عارفها
ولله الحمد وبفضل الله بقى شعرى طول شعر شريهان من غير كدب ولا تهجيس كل ما هنالك
انى اخر مره قصيت القصه دى قررت انى ابدأ من شعرى من الصفر كأنى لسه مولوده
واللى شجعنى اكتر انى جوزى بيحب الشعر الطويل
وهوريكم طول شعرى بس فى اخر الموضوع
طبعا انتوا زهقتوا وعايزين تعرفوا انا عملت ايه ؟!!!
بصوا يا جماعه لا سحرر ولا شعوذه مش هقولكم انا نمت صحيت لقيتوا طويل ولا
هقول ده فى اسبوع هتمشى تجرجرى شعرك فى الارض ولا الكلام
ده خالص بصوا كل حاجه بتاخد وقتها والاستعجال بيبوظ كل اللى بتعمليه عايزه اقولك
لو عملتى كل حاجه ومحطتيش فى دماغك يا ترى هيطول امته ياترى هيتقل امته
هتلاقى نفسك فعلا اتفاجأتى انى شعرك اتغير من غير ما تحسى يعنى اهم نقطه انك
متحسبيش الوقت ده خالص ممكن شعرك يطول فى شهر فى سنه انتى
وطبيعه نمو شعرك فاصبرى ثم اصبرى ثم اصبرى
ندخل بقى ع المفيد :_
اولا :_ شعرك ده جزء من جسمك يعنى محتاج فايده الاكل زى ما جسمك محتاجها بالظبط
بس لازم تبحثى عن الاغذيه السليمه والمفيده لشعرك
زى مثلا
الدجاج واللحوم :_الغنيه بالبروتينات التى تمد الشعر بالاحماض الامينيه الضروريه لانبات الشعر
السبانخ :_ غنيه بفيتامين البيوتين المفيد للشعر ويمنع تساقطه
الجزر _ الخضروات الورقيه _ البقوليات ) كلها اغذيه مفيده للشعر والجسم كله فيجب عليكى
التنوع بالاغذيه فى خلال الاسبوع فهى عامل اساسى فى تغذيه الشعر ومن غير
الغذاء اى حاجه هتعمليها لشعرك ملهاش لزمه
ثانى حاجه الشرب :_
ودى مش محتاجه كلام لازم تشربى مايه وسوائل مثل العصائر والفواكهه الطازجه
لانى بدونها كأنكى تزرعين فى ارض بوررر عمرها هتنبت
وفى غسيل الشعر طبعا احنا عارفين الميه بتاعتنا جميله ومش ملوثه خالص ومبتوقعش
شعرنا خالص
عشان كده لازم لازم لازم تغلى الميه كويس قبل ما تغسلى بيها شعرك
حتى لو عايزه المايه بارده اغليها وسبيها تبرد وبعدين اغسلى
بيها شعرك لانى الغلى بيقتل اى ميكروبات فى المايه وياريت اللى معندهمش فلتر
يعملو كده فى مايه الشرب يغلوها وبعدين يسيبوها تبرد ويدخلوها الثلاجه
لانى المايه دلوقتى غير صحيه بالمره
اخر حاجه بقى فى النقطه دى على قد ما تقدرى متغسليش شعرك اه متغسليهوش
متستغربيش سيبيه على قد ما تقدرى يستفاد من زيوت شعرك الطبيعيه
دى لوحدها غذاء كامل لشعرك يعنى فى الشتاء اغسليه كل اسبوعين مره كفايه قوى
ومتخافيش مش هيعفن ولا حاجه
نيجى بقى للعنايه الخارجيه للشعر
اولا متستخسريش فى شعرك يعنى نقى نوع الشامبو اللى بتستعمليه حتى
لو كان غالى شويه مش مشكله المهم انه ميضرش شعرك ويفيده
انا مثلا شعرى بيجى قوى على شامبو تريسمى بصراحه رائع وممتاز جدا
ده ارتحت عليه جدا وسعره 65 ج مصرى
بس طبعا كل واحده نوع شعرها بيختلف عن التانيه يعنى كل واحده تشوف افضل
نوع شامبو لشعرها وتستعمله والانواع كتير بس اهم حاجه
متسترخصيش وعلى رأى المثل الغالى ثمنه فيه وبأمانه هتلاقى النتيجه واضحه
المهم نكمل
انتى بقى هتستعملى فى الغسيل مره شامبو وبلسم ومره شامبو وحمام كريم
يعنى انتى النهارده غسلتى شعرك بشامبو وبلسم
الاسبوع الجاى اغسليه بشامبو وحمام كريم لانى لا كتر الحمام كريم حلو ولا كتر البلسم
حلو
انا بستعمل بلسم تريسمى برضه يعنى نفس نوع الشامبو فالفايده بتكون اكثر
ودى صورته
وحمام الكريم بستعمل فاشكول ب60 ج مصرى بس حلو جدا جدا جدا
الفرق اللى بين البلسم والحمام كريم البلسم بتغسليه على طول زى الشامبو
فبيطرى الشعر بس اما حمام الكريم بتسيبيه فى شعرك حوالى 10 د.ق
ويا سلام لو الحمام متبخر يبقى ايه عنببببببببببب ده بقى بيطرى الشعر وبينعمه وبيغذيه
نيجى بقى للمهم ودى اهم خطوه هى (حمام الزيت)
لازم حمام الزيت ده ان شاء الله تعمليه مره كل شهر تحطى فيه كل انواع الزيت اللى عندك
هقولك انا كنت بحط زيوت ايه (زيت الزيتون البكر الاصلى _ زيت الخروع _ زيت جنين القمح _
زيت دابر بردهان املا (مش تيجيبى دابر املا لا هتلاقى مكتوب كلمه بردهان دى اهم حاجه )
وادى صورته للى مش عارفاه
وفى بقى زيت ده اللى بجد سحر عارفين زيت ايه (زيت الذره بتاع الاكل) اه والله ده مغذى جدا
المهم انك تعملى خلطه الزيوت دى وتحطيها على شعرك وسيبيها
انا بنام بيها واربط فوقيها طرحه واسيبها لتانى يوم بالليل وبعدين اغسل شعرى قبل ما انام
بس كده فضلت ماشيه ع النظام ده بس بقى كل فتره
اعمل مثلا خلطه المايونير دى برضه سحر ( بحط المايونيز مع الزيوت واحط على شعرى واسيبها
ساعتين وبعدين اغسل شعرى )الخلطه دى مفعولها بطئ بس نتيجتها ممتازه بستعملها مره كل
3 شهور بس نتيجتها تستاهل الانتظار
عايزين بقى تعرفوا النتيجه بعد كل ده تعالوا ش
