العرايس اللي هيقصوا شعرهم ...يسمعوني الاول

أحلي بنات ..واحلي عرايس

طبعا كتير منكم بتبقي ناوية تقص شعرها قبل الفرح والزواج
و رأيي انه ده شيء كويس لانه 
هتشيلي المقصف من ناحية 
وهتضبطي وتغيري شكلك طبعاااا من ناحية تانية 

عشان كدة حبيت اقولك نصايح مهمة جدا 
( في رايي انا انها مهمة والله اعلم هتعجبكم ولا لا ؟)

قبل اول نصيحة
هاقول 
النصيحة الذهبية
بلااااااااش رااااااااجل
والكوافيرات الستات بقت كتير 
وشاطرين والحمدلله
ربنا يبارك فينا ههههههه

النصيحة الاولي

كوني جريئة وأقدمي علي قص شعرك ولا تخافي 
فانتي شابة وحتما سينمو غيره وربما افضل كمان من شعرك الحالي

النصيحة التانية 

ماتقصيش شعرك يوم الفرح ولا قبلها بيوم واحد يعني لازم قبلها بكام يوم كدة
عشان تلحقي تشوفي القصة والستايل وتتاكدي انه لايق عليكي
وممكن يبقي فيه وقت تغيريه او تضبطيه لو حبيتي

النصيحة التالتة

بلاش تقصي قصة قصيرة اوي من الاول 
يعني حتي لو عاجباكي قصة وستايل معين 
اعملي منه علي طويل حاجة بسيطة عشان لو حبيتي تضبطيه يبقي 
تلاقي مجال وشعر يساعدك انك تضبطيها من غير ماتبقي ولد
الا اذا واثقة مية في المية في اللي هيقصلك يبقي اتوكلي علي الله من الاول

النصيحة الرابعة

انا عاوزاكي تكوني وسط في معاملة الكوافيرة ...!!!!
يعني 
لا انك داخلة حرب ومشمرة ومستعدة لها
ولا انك مسلمة نفسك تماما لها 
احنا ديننا وسط
يعني تاخدي حذرك اه ..بس مش حرب يا حبايبي 
تاخدي حقك طالما دفعتي فلوس (وهافهمك ازاي)
وفي نفس الوقت تعامليها بلطف ورافة وكانها اختك بالضبط 
واللي ماترضيهوش علي اختك ماترضيهوش عليها
(دي نصيحة مخلصة والله مش عشان شغلتي يعني عاوزاكي تبقي حنينة معايا ..لااااهههه)

النصيحة الخامسة

تختاري من الاول كوافيرة حسنة السمعة
وخصوصا قصة الفرح ..يعني لو يوم عادي ماشي ممكن اقولك مش تدققي اوي
لكن الفرح والجواز لازم تحرصي
وممكن جدا يبقي حد غير كوافيرك اللي هتعملي فيه العروسة
يعني ممكن تلاقي محترفة في القص لكنها في مكان مش مشهور او ماجذبكيش لعمل باكيدج العروسة
يبقي قصي معاها وبعدين روحي عادي كوافيرك يوم فرحك 

النصيحة السادسة

خدي معاكي صورة او اكتر للتسريحة او القصة اللي انتي بتفكري فيها
يعني ماتعتمديش علي خيال الكوافيرة
ولا تعتمدي انها هتفهمك مية في المية 
وكمان عشان مايحصلشي سوء تفاهم بينكم 

النصيحة السابعة

الشرط نور
طالما خدتي صورة للتسريحة
وطالما هي وافقت من الاول وقالت لك اوكيه هطلعلك الستايل ده بالضبط
يبقي حقك بقي انها تنفذ كلامها وتطلعلك المنظر زي ماطلبتيه 
وده تكوني واضحة وتقوليهولها من الاول
عشان ماتستهترشي وتقصلك والسلام 
((النصيحة دي بالذات عن تجربة اني شفت ناس كتير وفاتحين كوافيرات 
وهما مش بيعرفوا في التجميل الا القليل
واسالهم الاقيهم بيستتفهوا القص اوي
تقولي 
اه اللي بتييجي عاوزة تقص باقصلها ..هو القص ايه يعني ..مع انها معترفة ومعلنة انها 
مش خبرة باعمال الكوافير ))

النصيحة الثامنة

اهتمي بكل تفصيلة في قصتك اللي عاوزاها 
وخصوصا لو مش عاوزة الشعر يقصر
يبقي توضحي من الاول وتقولي وتشاوري بالضبط اد ايه عاوزة تقصي من شعرك 
عشان ماترجعش تاكلهولك وتقولك ..انتي ماوضحتليش كدة او كدة 

النصيحة التاسعة

احنا قلنا مش حرب في الكوافير
وهي اختك بالضبط
بس برضة
عينك في وسط راسك يا حلوة
يعني مش تقعدي ترغي في التليفون
او تتفرجي علي مجلة 
او تتكلمي معاها وتساليها عن حاجات تانية
وحضرتك مش مراقبة اللي بيحصل في شعرك
لانه حتي سبحان الله
ممكن هي تكون اتلهت او انشغلت ونسيت التفاصيل اللي طلبتيها
وانتي عارفة شعر البنت زي عود الكبريت
بيتحرق مرة واحدة بس ههههههههه
وفي نفس الوقت مش تزوديها وتقفيلها عالواحدة بالضبط
لانه في الاول كدة ممكن تحسي انه الموضوع ماشي في طريق البوظان
بس هي عارفة وفاهمة وهتظبطلك الموضوع 

وأخيرا
اسال الله ان تكونوا احلي عرايس
ومن غير معصية الله خالص
لان السعادة رزق من عند الله
وماعند الله لا ينال بمعصيته