اوعي تفطمي ابنك بالمر او بالروج وشوفي فطمت بنتي ازاي

من فضلك قيمي الموضوع عشان يتثبت والكل يستفاد 


بشوف امهات بيفطموا عيالهم بالصبر والمر ودا مررررررررررررررررررررررررررررررررررررررررررررررررج دا والله ماحد يقدر يتحمل نقطه منه احناالكبار مانقدرش عليه حرام نتعب نفسيه الابن بانه يدوقه دا غير انه مش بس هيعيط لانه اتفطم دا كمان هيعيط لان طعم لسانه مر وانتي اللي هتشربي عياطه دا 


تاني حاجه بتعملها الامهات بيحطوا روج علي سدرهم ويلحوسوه كده ولما الطفل يشوفه بيقرف منه 
والطريقه دي مش صح برده لانها اكيد هتاثر علي نفسيه الطفل


امال يقي يافتوكه هتفطمي ابنك ازاااااااااااااي 
هقولك انا عملت مع بنتي ايه 


بصي ياستي 
الاول صلي عالنبي 
عليه الصلاه والسلام 

هتيجي في الايام الاخيره قبل الفطام وتحاول تقللي من الرضاعه للطفل بحيث انه يوصل لانه ما يرضعش الا مره قبل ماينام الظهر ومره كمان قبل ما ينام بالليل 

وفي يوم كده من الايام لو كنتي خارجه مثلا او ابنك لعب كتير وراحت عليه نومه الظهر من غير رضاعه يبقي بس هو دا وقتها ما ترضعيهوش كمان لما يجي بالليل او او رضع الظهر مش مشكله يوم ما تقرري تفطميه تيجي بالليل وما ترضعيهوش قبل النوم 
وسهريه جامد قوي 
وقبل ما ينام اديله معلقه توبلكسيل بتاع الكحه دا اللي بينيم او ممكن تديله فنستيل او افيل اللي هو بتاع الحساسيه معلقه واحده مش هتضره بس هتساعدك انه ينام علي نفسه من غير ما يطلب صدرك 


وهتعملي ايه بقي 
ما تشتعمليش اي حاجه من المر ولا الروج ولا الكلام الفاضي دا
انتي لما ابنك يعيط لفيه بالبطانيه او الكوفرته بتاعته وخديه في حضنك كده وشيليه ولفي بيه الشقه مع معلقه التوبلكسيل دي وياسلام لو ياخد دش محترم كده يهدي اعصابه وهي ساعه من العياط بتاعه وهو هتلاقيه نام في الاخر لوحده 
وهما يومين وهتلاقي الطفل اتفطم ونسي صدرك خالص واتفطم الباشا 

بس انتي بقه البسي حاجه برقبه مستوره كده بحيث انه مايشوفش صدرك فا يفتكره ويقعد يطلبه ويزن 
وكمان انتي بقي اكليه اكلات من اللي بيحبها وزغطيه قوي قدر المستطاع اكليه رز ومكرونه وبطاطس من الاكلات اللي بتشبع وكمان العيال بتحبها وكمان شيبسي 

وحلويات اهو اي حاجه تسكته وتنسيه الرضاعه 
وبكده تكوني فطمتي ابنك بطريقه سليمه ميه في الميه 
ياريت بقي تدعولي بقضاء ديني بسهوله عاجلا غير اجل 
وماتنسوش التقييم عشان الموضوع يتثبت وتاخدي ثواب كل اللي يستفاد منه بسببك

اي خدمه ياقمرات 

ملحوظة انا بكرر لا تعطي دواء الا باستشارة طبيبك الاول ولا تكثري من استخدام المهدئات وادوية الكحة والسعال يعني الاخت صاحبة الموضوع قالت معلقة صغيرة واحدة فقط في نهاية اليوم ويفضل استخدام نظامها دون الدواتء اللهم بلغت اللهم فاشهد