طريقة عمل جيست بوك بنفسك وفي البيت

اولا ايه هو الجيست بوك ده ؟؟؟ دا اوتوجراف عشان المعازيم تكتب فيه كلمة للعروسة و العريس في الفرح و هو حاليا تقليعة جديدة و كل البنات بتحب تحطه في الفرح او الخطوبة و بصراحة بيبقى ذكرى جميلة جدا و انا حباها
بس فرح بنتي قرب و قررنا نجيب جيست بوك زي كل الناس بس لقيناه غالي شويتين تلاته اربعة لقيناه ب 400ج مصري و شكله عادي جدا و دورنا كتير بس ملقناش حاجة حلوة و بس قررنا احنا اللي نعمله بنفسنا و نخوض التجربة دي بس بصراحة كانت حلوة و بسيطة و اتكلف 50ج مصري تخيلو اه والله و لا مليم زيادة و بعدها قررنا نساعد كل العرايس و نقولهم عملناه ازاي يمكن نقدر نساعد حد
يللا اقولكو على الخامات
دوسية للورق
نص متر اسفنج رقيق
نص متر ستان ابيض (اي لون انتي تحبيه)
نص متر تل جليتور
مقص
مسدس شمع
ديكور عشان نزوق الجيست بوك
خرامه للورق



اولا دا شكل الدوسية اللي احنا استخدمناه عشان ياخد الورق بسهوله

و بعدين نجيب الاسفنج و نلزقه على الدوسيه من بره كبطانه بس لازم يكزن اسفنج رقيق

و هيبقى بالشكل ده و بعد كده نقص الزيادات

و بعدين نجيب الستان و التل و نشبكهم في بعض بالدبابيس لوحدهم الاول

و باستخدام مسدس الشمع نلزقهم على الدوسيه من بره بس ضروري يكون اللزق جامد و تشدي القماش عشان ميهويش منك

طبعا الزيادات اللي جوه دي شكلها مش حلو خالص انا جربت شريط ستان عليها من جوه بس كان شكله مش حلو خالص فرحت المكتبة بيتباع عندها حاجة كده شبه ورق الاشعة لونه ابيض بيستخدموه في المذكرات بتاعة الطلبه جبت من عنده اتنين عشان اقفل على الشغل و الحمد لله شكله حلو بس متنسيش تقصيها حسب المقاس طبعا

بس نيجي بقى للديكور هاتي اللي بعجبك انا اولا جبت التل مشغول و كان مش غالي ب 10 ج النص متر و جبت فرشتين من محلات تغليف الهداياعشان احطهم عليه من بره زي الصورة كده






نيجي بقى للورق انا جبت فرخ لوح عادي جدا لان مكنش في ورق نفس مقاس الدوسيه و قطعناه و خرمناه و براحتك بقى في العدد الفرخ بيعمل حوالي 8 ورقات و الفرخ بجنيه يعني مش هيتكلف خالص
انا زوقت اول ورقه اللي هكتب فيها العروسة و العريس بطريقة سهله جدا و مش مكلفه خالص

يارب تعجبكم يارب و يفرح كل البنات يارب و يسعد ايامهم قولو امين
اميييييييييييييييييييييييين